Martes, 07 Xuño 2016 00:53

Catalá asegura que se revisaron todas as causas penais no prazo previsto aínda que recoñece que non pode certificalo

Escrito por DXustiza
Valora este artigo
(1 Voto)

O ministro de Xustiza en funcións reduce a 302.132 os procedementos clasificados e admite que o día 1 de xuño aínda quedaban uns 12.000

O ministro de Xustiza en funcións, Rafael Catalá, afirmou hoxe que todas as causas pendentes de clasificar en sinxelas ou complexas o pasado mes de decembro revisáronse no prazo que marcaba a lei, o 6 de xuño. E, de paso, volveu a rebaixar, esta vez a 302.132, a cifra de 324.000 que ofrecera hai dúas semanas.

A reforma da Lei de Axuizamento Criminal impoñía aos fiscais no seu artigo 324 a clasificación das causas entre sinxelas _cuxo prazo de instrución vencería hoxe mesmo_, e complexas, para as que se podía solicitar unha prórroga de 18 meses.

E Catalá considera que o traballo se completou, malia non poder certificar uns datos que, en realidade, non elabora o Ministerio, senón que proceden dos operadores xudiciais. "Non me corresponde a min _subliñou_ certificar os datos de actividade que nos facilitaron a Fiscalía e o Consello Xeral do Poder Xudicial, pero a miña confianza e a miña certeza persoal baséase nos profesionais, nos xuíces, letrados e fiscais".

O ministro desvelou tamén que ao 1 de xuño aínda quedaban por revisar algo máis de 12.000 asuntos, pero manifestou a súa confianza en que ao final se puidese avaliar individualmente cada un deles, en lugar de acudir á petición xenérica de prórroga que a Fiscalía Xeral recomendara aos fiscais no caso de que non fose posible revisalos todos en prazo.

Con todo, esta confianza do ministro en funcións choca coa realidade expresada desde algunhas fiscalías, que recoñeceron acudir a este procedemento para evitar a caducidade dun número indeterminado de causas penais.

A solicitude indiscriminada de prórrogas podería orixinar unha onda de recursos e impugnacións por parte dos avogados, tal como informou DXustiza o pasado día 3. Os letrados consultados por este diario consideraron inadmisible solicitar a complexidade dunha causa co pretexto de non podela revisar a tempo, e anunciaron o seu propósito de recorrer contra todas aquelas que non estean suficientemente motivadas polos fiscais.

Catalá afirmou que a revisión de causas serviu tamén para actualizar moitos procedementos e solicitar a práctica de novas dilixencias e mesmo o arquivo dalgúns deles. Precisamente, os avogados poñen tamén o acento nas causas que levan meses sen instruírse, mesmo un ou dous anos, e aseguraron que en ningún caso van permitir que se pida prórroga algunha para estes supostos.

 

 

Deixa un comentario

Asegúrese de introducir toda a información requirida, sinalada cun asterisco (*). Non se permite código HTML.

Top