A Comisión Permanente do Consello Xeral do Poder Xudicial (CXPX) reuniuse hoxe de forma extraordinaria para solcitarlle á Administración competente que adopte as solucións técnicas necesarias para impedir que nos documentos xudiciais con firma dixital figuren datos persoais dos xuíces e maxistrados, como o número de DNI ou a súa dirección de correo electrónico.
A situación foi denunciada a semana pasada polas catro asociacións xudiciais nun escrito dirixido ao CXPX no que se sinalaba que, con ocasión do comezo do proceso de implantación da firma dixital nalgúns partidos xudiciais do territorio no que o Ministerio de Xustiza mantén as competencias en materia de xestión da Administración de Xustiza, detectouse que a aplicación informática instalada permítelles aos destinatarios da notificación das resolucións xudiciais coñecer datos de carácter persoal dos xuíces que as asinan.
Entre as solucións propostas polo Consello está a de que se remita aos destinatarios das notificacións o texto da resolución sen firma dixital do xuíz, pero cun selo dixital do órgano remitente que inclúa un código seguro de verificación (CSV), necesario para que o cidadán ou os seus representantes poidan comprobar a integridade do documento na sede electrónica da Administración con competencias.
Deste xeito, a resolución asinada quedaría almacenada e protexida no sistema de xestión procesual, accesible só polas persoas autorizadas e incluíndo todos os datos que permitan garantir que o asinante foi un determinado xuíz ou maxistrado, un dos cales é o número de DNI.
A Comisión Permanente confía en que as disfuncións observadas queden resoltas nun prazo prudencial, polo que non considera necesario que se suspenda o proceso de implantación da firma electrónica das resolucións xudiciais, "tendo en conta que desde o órgano de goberno dos xuíces e desde o Ministerio de Xustiza están a arbitrarse as solucións oportunas".